All Day I Dream - მოგზაურობა ბგერების სამყაროში

“ცალკეული მუსიკა და ჟღერადობა არ იმსახურებს ერთ სივრცეში გამოკეტვას, ზოგჯერ მას უფრო მეტი თავისუფლება სჭირდება. როდესაც წვეულება ღია ცის ქვეშ იმართება, გარემო მუსიკას ახალ შრეებს უმატებს. რა თქმა უნდა, მიყვარს კლუბებში დაკვრა, მაგრამ მზის ამოსვლისას ან ჩასვლისას დაკვრა და ამ პროცესის საუნდტრეკის შექმნა ჩემთვის განსაკუთრებული გამოცდილებაა.”

ღონისძიებების სერია All Day I Dream, Lee Burridge-ს მენტორობით 2011 წელს, ნიუ იორკში,  დახურული წვეულებების ფორმატში დაიწყო და მალევე საერთაშორისო ფენომენად იქცა. გამორჩეული ვიზუალური სტილის, საინტერესო სელექტორების და მრავალფეროვანი მუსიკალური პალიტრის დამსახურებით, All Day I Dream საფესტივალო კულტურის ნამდვილ მარგალიტად იქცა. ამიტომაც გასაკვირი არც არის, რომ Lee Burridge-მა ეს იდეა ერთი კონკრეტული ქალაქის ან ქვეყნის საზღვრებში არ დატოვა და გლობალური მუსიკალური ლანდშაფტის გამდიდრება დაიწყო.

“ჩემი მიზანი იყო, რომ მუსიკალურ ღონისძიებებში ახალი ელემენტებით გამემდიდრებინა და დეკორაციად მეტალის ნივთების ნაცვლად ბუნებრივი კომპონენტები შემომეტანა. ნიუ იორკის კლუბებში ბრუტალური ელემენტები ისედაც დომინირებდა და ამ მიდგომით მსურდა ბუნებრივი ბალანსი შემექმნა. “

ამ იდეას საინტერესოდ ემსახურება სოციალური სივრცე - მულტიფუნქციური სივრცე შეკვეთილში, რომელიც All Day I Dream-ის ოჯახს 15 აგვისტოს უკვე მეოთხედ მასპინძლობს. ამ სივრცის მიზანია ადამიანებს დაეხმაროს შინაგანი ჰარმონიის პოვნაში, რომელიც სიმშვიდის და სტაბილურობის შეგრძნების მთავარი წინაპირობაა. 

ყოველდღიურ ცხოვრებაში დაგროვილი სხვადასხვა ტიპის ენერგიის პოზიტიური მიმართულების მიცემა ის მიზანია, რომელიც როგორც სოციალურ სივრცეს, ასევე All Day I Dream-ის ღონისძიებებს აერთიანებს.

შეკვეთილში Lee Burridge-ს გარდა Lost Desert, Super Flu, Pippi Ciez და Makebo-ს მოსმენა იქნება შესაძლებელი. Lost Desert ბელგიელი მუსიკოსის და დიჯეის, Patrick Bruyndonx-ის სასცენო ფსევდონიმია. მისი შემოქმედებითი საქმიანობა ზედმიწევნით იმეორებს იმ პრინციპებს, რომელიც All Day I Dream-ის მთავარ გასაღებს წარმოადგენს.

“შემდეგ უკვე ბელგიაში შევხვდით ერთმანეთს და მე ის სახლში დავპატიჟე, რათა მუსიკალურ იდეებზე ერთად გვემუშავა, რისი შედეგიც აღმოჩნდა  ‘Stand Up Right’ და ‘No Wicked For The Rest’-ის დემო ვერსიები.” - Lost Desert იხსენებს, რომ 2015 წელს დაწყებული თანამშრომლობა ძალიან ბუნებრივად განვითარდა და თავისი გზაც იპოვა. 2019 წელს არტისტებმა კოლაბორაციული ალბომი Melt გამოსცეს, ბოლო თანამშრომლობა კი ლეიბლის კომპილაციურ ალბომში Lost Desert & Friends III შედგა.

Super Flu კი Feliks Thielemann-ისა და Mathias Schwarz-ის დუო, რომელიც 2005 წლიდან, მელოდიური ტექნოსა და ჰაუსის ელემენტების შერწყმით ენერგიულ, ემოციურ და გამორჩეულ მუსიკალურ გამოცდილებას ქმნის. ისინი 2022–2023 წლებში დაუახლოვნენ Lee Burridge-ს და მათ რეგულარულად დაიწყეს ერთსა და იმავე ღონისძიებებზე გამოსვლა. Super Flu All Day I Dream-ის ხშირი სტუმარია.

საინტერესო ისტორია აქვს ასევე Pippi Ciez-ს, რომლის დებიუტიც 2020 წელს, All Day I Dream-ზე EP "Riziki"-ის სახით შედგა, რომელიც Idd Aziz-თან ერთად ჩაწერა. ეს რელიზი ლეიბლზე მოხვდა მას შემდეგ, რაც Lost Desert-მა მისი მუსიკა Lee Burridge-ს გააცნო. Pippi Ciez, All Day I Dream-ის ერთ-ერთი ყველაზე გამორჩეული არტისტია ბოლო წლების განმავლობაში. მისი ჟღერადობა აფრო და ორგანული ჰაუსის ელემენტებს, ჰიპნოზურ რიტმებსა და ემოციურ მელოდიებს აერთიანებს - ქმნის გამოცდილებას, რომელიც ერთდროულად ენერგიული და სიღრმისეულია.

Makebo-სა და All Day I Dream-ის ურთიერთობა უკვე რამდენიმე წელია გრძელდება და ის ლეიბლის ერთ-ერთ მნიშვნელოვან არტისტად ჩამოყალიბდა. 2019 წელს ის პირველად გამოჩნდა All Day I Dream-ის კომპილაციაზე A Winter Sampler-ში. Makebo ელექტრონულ მუსიკას კინემატოგრაფიულ ხასიათს სძენს. მისი შემოქმედება მრავალშრიანი ტექსტურებითა და მოულოდნელი მუსიკალური გარდაქმნებით, მსმენელს მუდმივ მოძრაობაში ამყოფებს.

სოციალური სივრცის ინიციატივით, All Day I Dream-ის საქართველოში ვიზიტი უკვე საინტერესო ტრადიციად იქცა, რაც მნიშვნელოვან ნიადაგს ქმნის როგორც ახალი მუსიკალური ექსპერიმენტებისთვის, ასევე საფესტივალო კულტურის განვითარებისთვისაც.